Enara: Etortzen lehenetarikoa da, kolore politenak ditu berak. Buruaren aurrealdea gorriska, burua eta gorputza goitik urdin iluna, azpia horiska ta buztana borobildua bi puntekin, goitik begiratuta buztanean puntutxo zurixkak. Neguak Gineako golkoan igarotzen ditu.
Enara Azpizuria: Izenak dion bezala, azpitik zuri zuriak dira, eta baita ipurtxuntxurrean ere, argazkian ikus daitekeen bezala. Negua Afrikan igarotzen du honek ere, Gineako golkoan honek ere.
Haitz Enara: Hau da Hirundidoetan eskasena gurean. Besteak baino diskretoagoa da, marroi edo arrea baita. Izenak dion bezala, haitzetan egiten ditu kabiak. Halere, zubietan ere egiten ditu, Hauek behintzat zubi baten azpian dute kabia, argazkian ikus dezakezue. Migrazioan ez da besteak bezain urrun joaten, Espainia hegoaldea edo Afrika iparraldera joatearekin konformatzen da. Batzuek gure kostaldean bizi dira urte guztian zehar.
Sorbeltza: Oso hegazti interesgarria, iluna, ia beltza, eztarri zuria, hego handiak, hanka txikiak... Horren hanka txikiak non ezin duen lurrean zutik egon. Ia bizi guztia hegan ematen du, egunean 1000 km egin ditzake. Kumatzea ez, beste guztia hegan egiten du: Ura edan, xomorro hegalariz elikatu, kopulatu... Kumatzeko eraikinetako zuloak erabiltzen ditu. Udaberrian etortzen zaizkigun guztietatik, azkenak dira Euskal Herrira heltzen eta lehenak alde egiten, beraien kumeak hegan ikasi bezain pronto Afrikara abiatzen dira, uztailaren amaieran.
